MWANAFUNZI AUAWA KWA BOMU NA WENGINE WANNE KUJERUHIWA - KIGOMA

ACP Fraisser Kashai

 Na Mohammed Mhina na Pardon Mbwate, wa Jeshi la Polisi

Mwanafunzi mmoja wa darasa la kwanza katika shule ya msingi ya Kigadye wilaya ya Kasulu mkoani Kigoma, Abeid Manase(8), amefariki dunia hapo hapo na wengine wanne kujeruhiwa vibaya baada ya kulipukiwa na bomu la kutupwa kwa mkono walilokuwa wakilichezea.

Kamanda wa Polisi mkoani Kigoma ACP Fraisser Kashai, amewataja watoto waliojeruhiwa na bomu hilo kuwa ni wanafunzi wawili wa darasa la kwanza Tuju Seluke(7) aliyejeruhiwa tumboni na Sarah Manase(6) aliyejeruhiwa kwenye paja na mguu kulia. wote wanafunzi wa darasa la kwanza katika shule ya msingi Kigadye wilayani Kasulu.

Kamanda huyo amewata wengine waliojeruhiwa kuwa ni watoto wadogo wenye umri wa miaka minne kila mmoja ambao walikuwa wakichezea bomu hilo kwa pamoja ambao ni Enjord Seluke aliyejeruhiwa kwenye sikio la upande wa kushoto na Isaka Yohana aliyejeruhiwa kwenye jicho la upande wa kushoto.

Kamanda Kashai amesema majeruhi hao wote wamelazwa katika hospitali ya Misheni iliyopo katika kijiji cha Shunge wilauani Kasulu kwa matibabu zaidi na hali zao zimeelezwa kuwa zinaendelea vizuri.
Kamanda Kashai amesema jana majira ya saa 11.00 jioni, huko katika kijiji cha Kigadye, watoto hao walikuwa wakilichezea bomu hilo la kutupa kwa mkono na ndipo lilipowalipukia na kumuua mwenzao na wengine hao wane wakajeruhiwa.

Bomu hilo lilikuwa limefichwa katika moja ya bustani nyumbani kwa Bw. Ayoub James Luvahovi mkazi wa kijiji cha Kidae na likimbia mara baada ya tukio hilo na Polisi wanamsaka.

Katika tukio linguine Kamanda Kashai amesema huko Kasulu, watu wenye silaha wamemjeruhi kwa kumpiga risasi tumboni mfanyabiashara mmoja Bi. Deothera Malusha(23) na baadaye kumpora shilingi 150,000 pamoja na simu yake ya mkononi aina ya Nokia yenye thamani ya shilingi 55,000.

Amesema baada ya uporaji huwo, majambazi hayo yalikimbia na kutokomea katika msituni na majeruhi amelazwa kwenye Hospitali ya wilaya ya kasulu mkoni Kigoma na hali yake bado sio nzuri.

Wakati huo huo, Jeshi la Polisi Mkoani Kigoma linawashikilia watuhamiaji haramu 52 kwa makosa ya kuingia na kuishi nchini bila ya kibali.

Kamanda Kashai amesema kuwa wayuhumiwa hao walikamatwa katika maeneo mbalimbali walipokuwa wakifanya shughuli za uvuvi mkoani humo.

SOMO LA POLISI LA USALAMA WETU KWANZA LAINGIZWA KATIKA MTAALA WA SHULE ZA MSINGI ZANZIBAR

Na Mohammed Mhina, wa Jeshi la Polisi Zanzibar

 Serikali ya Umoja wa Kitaifa Zanzibar, leo imezindua rasmi somo la Polisi la litakalojulikana kama Usalama wetu kwanza kuwa moja ya masomo yatakayofundishwa kwa wanafunzi wa shule za msingi visiwani humo.

Akizungua mpango huo, Waziri wa Elimu na Mafunzo ya Amali wa Zanzibar Mh. Ali Juma Shamhuna, amesema kuwa somo hilo litaanza kufundishwa kwa majaribio katika shule kumi za msingi kisiwani Unguja na hivyo kulifanya somo hilo kuwa sehemu ya masomo yaliyopo katika mitaala ya shule za msingi Visiwani hapa.

Mh. Ali Juma Shamhuna

Mh. Shamhuna amesema kuingizwa kwa somo hilo katika mitaala ya shule za msingi, kutasaidia kujenga uwezo na uwelewa wa kujitambua na katika kuwabaini wahalifu mbalimbali wakiwemo maadui wa taifa letu.

Mh. Shamhuna ambaye alikuwa mgeni Rasmi katika uzinduzi wa mpango huo, amekagua vitabu vitakavyotumika katika kufundishia somo hilo ambavyo vimeandaliwa na Jeshi la Polisi hapa nchini kwa ajili hiyo.

Awali katika Mkuu wa Wizara ya Elimu na Mafunzo ya Amali Visiwani hapa Bi. Mwanaidi Salehe Abdallah, alisema kuwa somo la Usalama wetu kwanza litakuwa kama somo linguine na litatungia mitihani ya kujipima na ule wa Taifa.

Somo la Usalama wetu kwanzxa ni somo lililobuniwa na Jeshi la Polisi hapa nchini ili kuwawezesha wananfunzi wa shule za msingi na sekondari kujenga uwelewa katika matumizi salama ya usalama barabara kwa lengo la kuepuka ajali za mara kwa mara.

Naye Mwakilishi wa Kamishna wa Polisi zanzibar ACP Mohammed Ali Mweri, amesema kuwa somo la Usalama wetu kwamza limeanzishwa na jeshi la Polisi na ni moja ya Miradi ya Polisi Jamii inayomjenga mtoto katika kuwatambua watu wabaya na jinsi ya kuwaepuka na hata kuwatolea taarifa katika vituo vuya Polisi.

Wakati huo huo, Mh. Shamhuna amekemea vikali baadhi ya waumini wa dini ya kiislamu kutaka kuhatarisha usalama wa Taifa letu kwa kudai kura ya maoni juu ya Muungano kabla ya shughuli za ukusanyaji wa maoni ya Katiba mpya Jamhuri kukamili.

Amesema watu hao ni hatari kwa Taifa letu na kwamba Serikali haiwezi kukaa kimya kuona amani inavurugika kutokana na kikundi cha watu wachache kwa imani za itikadi ya kidini.

Amesema tangu kukusanywa kwa maoni yaliyoandika Katiba mpya ya Zanzibar yenye sura ya Umoja wa Kitaifa, hivi sasa Zanzibar vimekuwa tulivu na eneo la mfano kwa nchi za Kiafrika zenye utulivu.

Amewataka Watanzania kuwaepuka na kuwabeza wale wote wenye kuleta migogoro na kutaka kuiingiza nchi yetu katika vurugu zisizo na msingi na badala yake kila mmoja awe mtulivu na kujishughulisha na kazi zinazoleta maendeleo.

Wakati wa risala yao, wanafunzi kutoka shule kumi zitakazofundisha kwa majaribio somo la Polisi la Usalama wetu kwanza, wameiomba Serikali kutowafumbia macho wale wote wanaochochea vurugu na ghasia kwani wamesema yanapotokea machafuko, wanaoathirika zaidi ni wale wasiojiweza wakiwemo walemavu, wazee, wanawake na watoto.

Naye mwanafunzi wa darasa la saba shule ya msingi darajani Rashidi Ali Mohammed, amesema kuwa somo hilo litawapa wanafunzi ujasiri wa kuweza kutoa taarifa Polisi pale wanapoona vitendo vya uhalifu mbele ya macho yao.