Mke wa Rais wa Shirikisho la Ujerumani Mama Daniela Schadt aipongeza Taasisi ya WAMA

Na Anna Nkinda – Maelezo 

TAASISI ya Wanawake na Maendeleo (WAMA) imepongezwa kwa kazi inayoifanya ya kuhakikisha  watoto wa kike ambao ni yatima na wanaoishi katika mazingira hatarishi wanapata elimu sawa na watoto wengine.

Pongezi hizo zimetolewa leo na Mke wa Rais wa Shirikisho la Ujerumani Mama Daniela Schadt (pichani), wakati akiongea na wafanyakazi wa  WAMA alipozitembelea ofisi za Taasisi hizo zilizopo jijini Dar es Salaam.

Mama Schadt ambaye ni Mke  wa Rais Joachim Gauck alisema watoto hao bila ya kupata ufadhili wa masomo wasingepata elimu lakini kutokana na ufadhili huo wanapata elimu ambayo itawasaidia hapo baadaye na hivyo kuinua hali ya maisha yao na familia zao na nchi kuweza kupata wataalamu wa aina mbalimbali.

Kuhusu suala la afya Mama Schadt aliishauri Taasisi hiyo  kuendelea kuwahimiza wanaume kuwapeleke wake zao ambao ni wajawazito katika vituo vya afya ili wote wawili waweze kupima na kujua kama wamepata  maambukizi ya Virusi Vya Ukimwi (VVU) au la.

“Baada ya kupima na kugundulika kuwa na maambukizi ya VVU watapewa  dawa za kupunguza makali ya Ugonjwa huo na hivyo  kumkinga mtoto aliyepo tumboni ili asizaliwe akiwa na maambukizi pia na wao wataweza kujikinga   na kutopata maambukizi mapya”, alisema Mama Schadt.

Kwa upande wake Mke wa Rais Mama Salma Kikwete alimshukuru Mama Schadt kwa kutembelea ofisi hiyo na kumueleza kwamba  aliamua kuanzisha Taasisi ya WAMA ili aweze kutoa mchango wake katika kuboresha  hali ya maisha ya  wanawake nchini.

Alisema wamewawezesha wanawake kiuchumi kwa kuwapa elimu ya ujasiriamali katika program ya Mwanamke Mwewezeshe ambayo kwa muda wa miaka mitatu imeweza kuwafikia  wanawake wapatao 60,000 katika mikoa ya Dar es Salaam Lindi na Pwani.

Mama Kikwete alisema, “Licha ya kutoa ufadhili wa masomo kwa watoto wa kike, tunafanya kazi ya kuimarisha afya ya wanawake na watoto kwa kutoa elimu ambayo inawawezesha kuzuia maambukizi ya ugonjwa wa Ukimwi, kuwahimiza ili waweze kushiriki katika  upimaji wa saratani za shingo ya kizazi na matiti pia  tumejenga uelewa kwa watoto wa shule ili waweze kujizuia na mimba za utotoni na maambukizi ya HIV”.

Wakati huo huo Mama Schadt na Mwenyeji wake Mama Kikwete walitembelea Hospitali ya CCBRT na kujionea kazi inayofanywa na Hospitali hiyo ya kuwahudumia wagonjwa ambao wengi wao ni wahitaji wakiwemo wanawake na watoto.

Akiwa Hospitalini hapo Mama Schadt alisema wataendelea kushirikiana na CCBRT kwa kuboresha utoaji wa huduma za afya.

Naye Mama Kikwete alisema nchi za Ujerumani na Tanzania ni washirika wa Hospitali ya CCBRT ambayo ni maalum kwa ajili ya kuwasaidia watanzania, wanawake na watoto wenye mahitaji  maalum kama walemavu wa miili na ngozi ambao  wanasaidiwa bure.

“Kuna tatizo la Fistula ugonjwa ambao ni mgumu na unamdhalilisha mwanamke  na kumpotezea matumaini lakini hivi sasa kuwepo kwa Hospitali hii kumewapa wanawake  matumaini mapya , tatizo la Fistula linatokana na mwanamke kupata uchungu wa muda mrefu wakati wa kujifungua kitendp kinachosababisha  kibofu cha mkojo kupasuka”.

Lakini wao  wanaweza kuchukulia ugonjwa huu kuwa ni tatizo lingine  kumbe mgonjwa wa Fistula anaweza kutibiwa, akapona na kurejea katika hali yake ya kawaida”, alisema Mama Kikwete.

Serikali ya Ujerumani ni mmoja wa washirika wa miaka mingi wanaotoa huduma za Afya katika Hospitali hiyo na hivi sasa fedha  nyingi wanaelekeza katika ujenzi wa jengo la wazazi .

Wakiwa Hospitalini hapo walitembelea wodi ya watoto waliofanyiwa upasuaji wa mdomo sungura, waliongea na wanawake wanaosubiri na waliofanyiwa upasuaji wa ugonjwa wa fistula, waliona utengenezwaji wa miguu bandia na kujionea ujenzi wa jengo la wanawake pia waliwasalimia  wagonjwa waliofika kutibiwa.

Mama Schadt ameambatana na mumewe Rais Joachim Gauck aliyepo nchini kwa ajili ya ziara ya kikazi ya siku tano.