MISS KIGAMBONI WATOA MISAADA KATIKA SHULE YA MSINGI KIGAMBONI

Kutoka kulia ni Colombani Mpogola mwalimu mkuu wa shule ya msingi Kigamboni,  Eddah Sylvester (21) Miss Kigamboni City Angela Msangi na Somoe Ng'itu waratibu wa Miss Kigamboni wakiwa na msaada wa rangi walioutoa shuleni hapo.

Mmoja wa waratibu wa Miss Kigamboni City Somoe Ng'itu akikabidhi msaada wa rangi kwa mwalimu mkuu wa shule ya msingi Kigamboni Colombani Mpogola, wa pili kutoka kulia ni Miss Kigamboni City  Eddah Sylvester na wa tatu ni Angela Msangi mratibu Miss Kigamboni.    

**************************

HABARI PICHA NA BIN ZUBEIRY BLOG

WAANDAAJI wa Miss Kigamboni 2012, K&L Media Solutions, asubuhi ya leo wamekabidhi vifaa vya ujenzi vyenye thamani ya Sh. Milioni 1.5 kwa uongozi wa Shule ya Msingi Kigamboni, ikiwa ni kutimiza ahadi yao ya kuchangia sehemu ya pato kutokana na shindano lao, lililofanyika Juni 15, mwaka huu katika ukumbi wa Navy Beach, Kigamboni, Dar es Salaam.

Akikabidhi vifaa hivyo, katika shule hiyo iliyopo mkabala na Mahakama ya Mwanzo ya Kigamboni, Mratibu wa Miss Kigamboni 2012, Somoe Ng’itu alisema kwamba waliahidi kufanya hivyo kwa sababu wanajua umuhimu wa elimu na wanathamini na pia baadhi ya waandajii na warembo wa shindano hilo, walisoma katika shule hiyo.

Somoe, ambaye pia ni Mwandishi wa Habari za Michezo Mwandamizi wa gazeti la Nipashe, alisema kwamba kampuni yao imeamua pia kufanya hivyo ili kutoa mfano kwa wadau wengine kuchangia miradi ya maendeleo ya elimu.

Aidha, Somoe ambaye ni Mjumbe wa Kamati ya Utendaji ya Shirikisho la Soka la Wanawake Tanzania (TWFA), alisema kwamba kutimiza ahadi hiyo ni mwanzo tu kwao wa kufanya mambo mengi mengine katika kuchangia miradi mbalimbali ya maendeleo.

Akipokea misaada hiyo, Mwalimu Mkuu wa Shule hiyo, Colombani Mpogola alisema anawashukuru sana K&L Media Solutions kwa msaada huo, kwani umekuja katika wakati mwafaka na mara moja umeanza kufanyiwa kazi kwa kukarabati baadhi ya madarasa ya shule hiyo.

Mwalimu Mpogola alisema kwamba K&L wametoa mfano mzuri na akawataka wadau na makampuni mengine kuiga mfano huo.

Mwanafunzi wa darasa la saba, Sebastian Charles alishukuru kwa niaba ya wanafunzi wenzake naye pia akatoa wito kwa wadau wengine kuiga mfano huo.

Katika shindano la Miss Kigamboni lililofana Juni 15, mwanafunzi wa mwaka wa pili Chuo Kikuu cha Dar es Salaam(UDSM), Eddah Sylvester (21) aliibuka mshindi, wakati Agnes Goodluck (20), anayesoma Chuo cha Usimaizi wa Fedha (IFM) mwaka wa pili aliibuka mshindi wa pili na Elizabeth Boniphace (21) aliibuka wa tatu.

Washindi hao watatu, na wengine wawili walioingia tano bora, Esther Albert (19) na Khadija Kombo (21) watashiriki shindano la Miss Temeke, Septemba mwaka huu kusaka tiketi ya kushiriki Miss Tanzania Novemba, mwaka huu.