JESHI LA POLISI ZANZIBAR LAANZA UCHUNGUZI WA TUKIO LA KUMDHULU KATIBU WA MUFTI ZANZIBAR

  Katibu wa Mufti wa Zanzibar Sheikh Fadhil Soraga akitolewa katika Chumba cha Huduma ya Mwanzo katika Hospitali ya Mnazi Mmoja baada ya kurushiwa Tindi kali na watu wasiojulikana wakati akifanya mazowezi huko katika Kiwanja cha Mwanakwerekwe.

 

 XXXXXXXXXXXXXXXXXXXXXXXXX

Na Mwandishi wa Jeshi la Polisi-Zanzibar

Jeshi  la Polisi Zanzibar, limeanza uchunguzi na msako wa kuwatafuta wale wote waliohusika kwenye tukio la kumwagia maji makali Katibu wa Mufti wa Zanzibar Sheikhe Fadhil Soraga, alfajiri ya leo (Novemba 6, 2012) wakati akiwa mazoezini mjini Zanzibar.

Taarifa ya Afisa Habari Mkuu wa Jeshi hilo Visiwani Zanzibar Inspekta Mohammed Mhina, imesema kuwa Jeshi la Polisi Visiwani humo limeanza uchunguzi na msako mkali wa kuwabaini na kuwatia mabaroni wale wote waliohusika katika shambulio la Katibu huyo wa Mufti Zanzibar.

Wakizungumza na Waandishi wa Habari kwa nyakati tofauti leo, Mkurugenzi wa Upelelezi wa Makosa ya Jinai Zanzibar  ACP Yusufu Ilembo na Kamanda wa Polisi mkoa wa Mjini Magharibi Zanzibar,  ACP Aziz Juma Mohammed, wamesema kuwa Waandishi wa Habari Ofisini kwake, Kamanda Ilembo amesema Jeshi la Polisi limesikitishwa na kitendo alichofanyiwa Sheikhe Soraga na kwamba wanakichukulia kama kitendo cha kihalifu.

Kamanda Ilembo amesema Jeshi la Polisi litahakikisha kuwa wale wote waliohusika na tukio hilo, wanabainika, kukamatwa na kufikishwa mahakamani kujibu tuhuma zinazowakabili na hatimaye sheria kuchukua mkondo wake.

Kwa upande wake Kamanda wa Polisi wa Mkoa wa Mjini Magharibi Zanzibar ACP Aziz Juma Mohammed, amesema kuwa tayari ameunda kikosi kazi cha Makachero watakaokusanya taarifa za kubaini njama na watekelezaji wa tukio hilo la kumwagia sheikhe huyo maji hayo yenye ukali.

Amesema Shekhe Soraga, alimwagiwa maji hayo katika viwanja  vya Mabata vilivyopo karibu na Msikiti wa Msumbiji akitokea upande wa Uwanja wa Michezo wa Aman kwenda Mwanakwerekwe ambapo akiwa katika eneo hilo alikutana na mtu mmoja ambaye naye alionekana kama mchukua mazoezi akitokea upande wa Mwanakwerekwe kuelekea Uwanja wa Aman na walipokuwa wakipishana ndipo alipomwagiwa machoni maji hayo yenye ukali.

Amesema baada ya tukio hilo Sheikhe Soraga alikaa chini kwa maumivu na baada ya kuda kidogo alipata wasamalia wema na kumchukua hadi kwenye Hospitali Kuu ya Mnazi Mmoja ambako alipatiwa matibabu ya awali kabla ya kusafirishwa kwa ndege ya Serikali kwenda Dar es Salaam ambako amelazwa katika Hospitali ya Agha Khan kwa uchunguzi na matibabu zaidi.

Naye Mufti wa Zanzibar Sheikhe Salehe Kabi, amewataka Wananchi wa Zanzibar  kuacha visa vya kulipiziana visasi vitendo ambavyo vinaweza kuleta vurugu na kuzua mtafaruku katika nchi yetu.

Aidha amewataka watu wote kuwa wamoja na kushirikiana kwa kila jambo na kwamba tofauti za rangi, kabila, dini na itikadi za kisiasa ziwe chanzo cha mafarakano ya Umoja wetu.

Kwenye uwanja wa ndege wa Kimataifa wa Zanzibar, Sheikhe Soranga, alisindikizwa na Makamu wa Pili wa Rais balozi Seif Ali Iddi, Mkuu wa Mkoa wa Mjini Magharibi Unguja Mh. Abdallah Mwinyi na viongozi wengine wa vyombo vya ulinzi na usalama na Mashekhe.

Wakati Jeshi la Polisi likiendelea na uchunguzi wa kujua aina ya maji hayo pamoja na kuwapata waliohusika katika tukio hilo, Jeshi hilo limewataka wananchi kuwa watulivu na kutoa ushirikiano wa kuwabaini wale wote waliohusika katika tukio hilo.