Mwili wa Mgimwa kuwasili kesho, kuzikwa Jumatatu Iringa

Marehemu Dk. William Mgimwa

MWILI wa Waziri wa Fedha na Uchumi, William Mgimwa (63) aliyefariki dunia juzi nchini Afrika Kusini baada ya kuugua kwa muda mrefu unatarajiwa kuwasili nchini  kesho.

Akitangaza ratiba ya kuwasili  kwa mwili na maziko ya Waziri Mgimwa kwa waandishi wa habari jana, Waziri wa Nchi, Ofisi ya Rais (Sera, Uratibu na Bunge), William Lukuvi, alisema shughuli zote zitafanywa na serikali.

Lukuvi alisema tayari serikali imeshaunda kamati mbili, moja ipo jijini Dar es Salaam, ina wajumbe kutoka Ikulu, Wizara ya Fedha na Uchumi, Wizara ya Afya na Ustawi wa Jamii pamoja na Wizara ya Mambo ya Nje na Ushirikiano wa Kimataifa ambayo itaongozwa na yeye.

Alisema kamati ya pili imeundwa mkoani Iringa ambayo itashughulikia namna ya kuuhifadhi mwili wa marehemu Mgimwa  kijijini kwake Magunga, ambayo itaongozwa na Mkuu wa Mkoa huo, Dk. Christine Ishengoma.

Lukuvi alisema  mwili wa Mgimwa utawasili kwa ndege ya Shirika la Ndege la  Afrika Kusini, majira ya saa saba mchana  katika Uwanja wa Ndege wa Mwalimu Julius Nyerere (Terminal II) na kupelekwa nyumbani kwake Mikocheni B, na itakapofika majira ya saa 11 jioni utapelekwa katika Hospitali ya Jeshi la Wananchi wa Tanzania (JWTZ) Lugalo jijini Dar es Salaam.

Mwenyekiti huyo alisema siku ya Jumapili, mwili wa Mgimwa utawasili nyumbani kwake majira ya saa 5:30, kisha utapelekwa katika Ukumbi wa Karimjee kwa ajili ya ibada, heshima za mwisho na salamu za rambirambi hadi saa nane mchana.

Alisema mara baada ya tukio hilo, mwili wa Mgimwa utapelekwa katika Uwanja wa Ndege wa Kimataifa wa Mwalimu Julius Nyerere (Teminal I) kwa ajili ya kusafirishwa kwenda Iringa ambapo unatarajiwa kufika majira ya saa 10 jioni ili kuwapa fursa wananchi wa mkoa huo kuuaga katika Ukumbi wa Siasa ni Kilimo.

Lukuvi alisema mara baada ya wananchi wa Iringa mjini kuaga, jioni hiyo hiyo mwili wa Mgimwa utapelekwa kijijini kwake Magunga kwa ajili ya kupumzishwa kesho yake (Jumatatu).

“Shughuli za kuwasili na hatimaye maziko zinafanywa na serikali kupitia kamati kuu na ile ya Mkoa wa Iringa, ambayo itapata mwongozo kutoka huko chini ya Dk. Ishengoma,” alisisitiza Lukuvi.

Akizungumza kwa masikitiko namna alivyomfahamu marehemu Mgimwa, Naibu Waziri wa Fedha na Uchumi, Saada Salum, alisema amejifunza mengi kuhusu uongozi mara baada ya kuanza kufanya naye kazi walipoteuliwa na Rais Jakaya Kikwete, Mei mwaka jana.

“Kwa kipindi cha mwaka mmoja na nusu niliofanya kazi na Dk. Mgimwa, nimejifunza mengi  katika uongozi. Kwani kazi kwake lilikuwa jambo la kwanza, kwa maana wakati mwingine alikuwa akikaa ofisini hadi saa 5 usiku, si hivyo tu bali hata siku za Jumamosi na Jumapili alikuwa akifanya kazi,” alisema.

Saada alisema alichojifunza kwake zaidi ni kwamba kama mtu anapewa dhamana ya uongozi anapaswa kuitimiza bila kuchoka na kulalamika.

Naibu waziri huyo ambaye hakutaka kusema ugonjwa uliosababisha mauti yake,  alisema mara ya mwisho aliwasiliana na marehemu Mgimwa kwa simu mwezi mmoja uliopita na katika mazungumzo yao alimweleza kuwa anaendelea vizuri.

Katika hatua nyingine, Chama  Cha  Mapinduzi  (CCM)  Wilaya ya  Iringa  Vijijini na Mkoa  wa  Iringa,  kimesema  kimepata  pigo  kwa kifo cha aliyekuwa  Mbunge   wa  Jimbo la Kalenga, William Mgimwa.

Wakati  serikali ya  Mkoa  wa  Iringa  ikiendelea na maandalizi  ya mazishi  ya Waziri Mgimwa, Mkuu wa Mkoa  wa Iringa, Dk.  Christine  Ishengoma amesitisha likizo  yake  iliyoanza hivi  karibuni  kutokana na msiba  huo mkubwa  kwa Mkoa  wa Iringa na Tanzania kwa ujumla.

Wakizungumza na mwandishi  wa habari hizi  jana  kwa nyakati  tofauti mjini hapa,   viongozi  wa CCM wa wilaya na mkoa pamoja na Kaimu Mkuu wa Mkoa  wa Iringa, Gerald Guninita, walisema kifo  cha Waziri  Mgimwa  si pigo  tu kwa  familia  yake bali pia kwa taifa kwa ujumla.

Mwenyekiti  wa CCM  wa Mkoa  wa  Iringa,  Jesca Msambatavangu,  alisema  kuwa CCM mkoani hapa  imepata  pigo  kubwa kwa  kumpoteza  mbunge  huyo na  waziri  na  kuwa katika uhai wake  Mgimwa alikuwa  mbunge wa  tofauti na  wengine na  kuwa  siku  zote  hakuwa mbunge wa  kujisikia kwa nafasi  yake.

Kwani  alisema  mbali ya kuwatumikia  vema  wakazi wa  Jimbo la Kalenga na  Watanzania  katika nafasi yake ya  uwaziri  wa  Fedha na Uchumi,  bado  Mgimwa  alikuwa kiongozi  wa  kushirikiana  vema na  chama na  wananchi  wake.

Alisema  Mkoa  wa Iringa  umepata  pigo  kubwa juu ya  kifo  hicho na kuwa Chama  Cha Mapinduzi  kitaendelea  kuenzi mchango  wake  katika kuyafanya  yale  yote  ambayo  katika  uhai  wake  alikuwa akiyapigania na  siku  zote katika ndoto  zake za  kuwatumikia  wananchi  wa Jimbo la Kalenga.

“Tunaamini  kila mtu ambaye amepata  kufanya kazi  na Dk.  Mgimwa anatambua  wazi kuwa  alikuwa ni mchapa kazi  na kiongozi   mpenda    watu…Dk.  Mgimwa mbali  ya  kuwa  waziri  hakuwa na majivuno  na  alikuwa ni kiongozi wa misaada hata katika majukumu yasiyo  rasmi  katika nafasi  yake…kweli  sina  cha kusema  zaidi ya  kuendelea na maandalizi ya mazishi yake,” alisema Msambatavangu.

Delophina Mwimbile  Mtafilalo ni Mwenyekiti  wa CCM wa Wilaya ya  Iringa  Vijijini,  alisema   bado  viongozi wa CCM wa wilaya  hiyo hawaamini kama Waziri Mgimwa amefariki dunia kwani tangu alipolazwa hawakupata nafasi ya  kumjulia hali.

“Kweli  tumepata  pigo  sana kwa kifo  chake hadi  sasa umetukuta  tumesimama hapa  nje  tusijue la kufanya  na hatujui   sisi  kama  viongozi wa Jimbo la Kalenga  ni   nani ataziba  pengo lake la ubunge,” alisema Delophina.

Kaimu Mkuu wa  Mkoa  wa Iringa, Gerald Guninita,  ambaye ni Mkuu wa  Wilaya ya  Kilolo alisema  kifo cha Mgimwa  kimepokewa kwa majonzi makubwa.

Mgimwa alifariki dunia juzi nchini Afrika Kusini alikokuwa amelazwa kwa matibabu.